陳皮爸其實都有好努力為陳皮付出, 不過當然我仲覺得唔夠多!!Haha
有左陳皮後真係嘈多左haha.
陳皮爸往往因為一句說話而被我鬧到一發不可收拾!
所以想比各位豬隊友一個溫馨提示, 千奇唔好同老婆講以下既說話!
1. 個仔都唔跟我, 佢淨係要你! 你抱返啦!
呢句真係找死, 尤其是我係在職媽媽, 我對佢既時間同你一樣, 佢一講呢句我就無明火起!!!!
唔跟你? 咁你知唔知點解佢唔跟你??
因為餵奶又係我, 換片又係我,
陪訓又係我, 陪玩又係我
你唔陪佢, 佢又點會跟你?
佢喊咪氹下佢羅! 唔跟你大晒!
2. 一沖完涼出黎, 陳皮爸: “沖咁耐架, 佢喊啦! 要搵你”
沖10分鐘叫耐? 你係廁所半個鐘又得?
喊你咪氹佢羅! 喊就係因為搵我架啦?
我湊就唔喊架!!! (雖然有時我一抱又真係唔喊hahahah)
3. 當我睇緊電話, 陳皮爸同個仔講: 媽媽玩電話唔理你呀?
雖然我知佢講笑, 但我都係忍唔住! haha
係呀, 我玩電話唔得架? 你玩成日就得?
4. 呢個危險呀, 唔好比佢玩! 唔好比佢睇電視呀! 唔好比呢樣佢食! 你咳就帶返口罩!
呡個危險呀, 唔好比佢玩! < 咁巴閉你自己陪返佢玩!! 我睇住有幾危險!
唔好比佢睇電視呀!< 咁你陪佢入房玩, 我去睇你睇緊既電視
唔好比呢樣佢食!< 咁以後你負責餵啦!
你咳帶返口罩! < 我唔舒服你湊返啦, 費事傳染你個仔!!
有時咳唔係因為唔舒服! 你估我病仲會唔帶口罩咩?
豬隊友!!你覺得你老婆會唔緊張個仔嗎?? 如果你湊既時間比佢少, 就少說話多做事.
我其實好民主, 我都有同陳皮爸講, 兩個人意見不同既時候總有一個人講事, 咁最公平就係邊個負責做就邊個話事!!如果你唔認同我做既方法, 最簡單就係自己湊返, 我絕對無意見!
好似沖涼係陳皮爸負責, 我係唔會批評佢沖涼既方式, 你沖就你話事.
不過其實豬隊友都好努力架啦! 陳皮爸雖然湊既時間比我少, 但其他野佢做野咁濟!
沖奶煮粥洗奶樽煲水洗衫換床單抹地多數都係佢做既, 所以佢唔湊仔都有做好多野,
只係比我得閒少少. 如果可以講少D錯既野就perfect啦!!!haha
附上溫馨親子照一張
Follow me:
Instagram: https://www.instagram.com/kaden.hk/
Facebook :https://www.facebook.com/kaden.hk
2019大阪櫻花之旅
育兒篇
玩樂購物篇
留言列表
購物分享 (1)
